صوت الحروف بيشدني
ويحطّني جنب السطور
هامش بسيط
تفسير لكلمه مُبهمه
أو شرح شئ
صوت الحروف دايما صديق
للي يسافر بالخيال
أو حتى يسكن وحدتُه
وانا قلبي شابك ف الحروف
وواخدها دايما سِكّتُه
واما الوجع زاد سَكّتُه
لكنُّه أبدا ما انخرسش
لسّه اللسان حي وما ماتش
لكنُّه ساكت م الهموم
ومن الغيوم ...
النايمه فوق الأرصفه
وامّا الضلام راح واختفى
ظهر الكلام
على سطر ورقه صُغيّره
أو حتى فوق جناحين حمام
الشِعر مُش كهف الغرام
ولا دايره مقفوله عليه
الشِعر كون أكبر كتير
كل القلوب لو جت تطير
ما تبانش فيه
وعشان كده ...
صوت الحروف بيشدّني
ف باكون قصيده ع الورق
او حتى من جنب السطور
هامش بسيط
أشرح معاني المفردات
طول م الحياه حبّة نقط
جوّه الورق دايما ح ابات
ح ازرع ورود شِعر وألم
واحضن قوي سن القلم
وازرع شجر للأمنيات
وان عمري ع السطر انتهى
إبقوا اكتبوا ...
الشِعر لحظة م انتهى
السقا مات
سيد منيرعطيه
عضو اتحاد كتاب مصر
من ديوان (كرباج عذاب)
إرسال تعليق