كل حرف ف حُضن إسمك
كاس غرام
نقطة واحده يدوقها عابد
يلقى نفسه ف لحظه هام
وابتدا يوصف جمالك
والكلام غير الكلام
من عبادَه لوصف صورتك
من جبينك لمّا خِصرك
يعني من عابد لعاشق
زي مايكون انفصام
كل ده من نقطه واحده
حالُه يصبح عكس حالُه
يبقى قلبي الحق عنده
أصله شارب كاس بحاله
لمّا نبضُه يروح وييجي
بين يمينه وبين شماله
والا يتطوّح ويبقى
ماشي عكس مسار خياله
والا حتى ينط برّه
ويجري عندك
أو يبات على باب مدينتك
واللا حتى جنونُه ياخده
يجري يدخل جوّه حُضنك
ينزوي جوّاكي منّي
يستخبّى فيكي منك
واللا يتسرسب لضلّك
أصله مش عايز يفوق
نفسه يفضل للنهايه
من معاني الشوق يدوق
من خدودك ورد صابح
والشفايف كاس ومزّه
والغرام من بدري فاتح
جوّه حُضنك أحلى لذّه
والعيون تسابيلها تبقى
ألف سهم ف روحي غزّه
واللي كان عايش ف عِزّه
ييجي عندك يبقى حارس
واللا خادم
أي حاجه والسلام
المهم يكون معاكي
لحظه لحظه وع الدوام
يشرب الشهد المكرر
من عصير الإنسجام
م انتي ف حروفك حبيبتي
كاس غرام
سيد منيرعطيه
عضو اتحاد كتاب مصر
إرسال تعليق