بحقِّ ترابِك الطَّاهر
وحُبَّ اعظم من الظَّاهر
تخلِّي ضناكي فـِـ عيونِك
وكوني عَفِيفَه للآخر
تقولي من زمان شايلَه
وايدِك لسَّه مش طايلَه
هأقول ربِّي يديم خيرِك
وتفضَل مَركِبك سايرَه
ولادِك هُمَّا أَولالِك
يحسُّوا الدَّفا بْـ شالِك
لا غيرهُم حدِّ شال عنِّك
ولا فـِـ الشِّدَّه لبَّالِك
فـَـ كوني رؤوفه ورحيمَه
وما تقلِّي ليهُم قيمَه
فـِـ غُربه كانوا أو فيكي
بأيدِك اِمسحي الغِيمَه
وضُمِّيهُم فـِـ أحضانِك
بحقِّ ما ضحُّوا علشانِك
وقالوا أمِّنا الغاليَه
وهانوا كُل من هانِك
وجعهُم طيِّبيه بإيدِك
وجرِّي الرَّحمَه فـِـ وريدِك
دا جايِّنلِك بروح الابن
عطاشا لبلَّه من فيضِك
ولو تاجروا فـِـ يوم بيهُم
وطالبوا يزيدوا مآسيهُم
قوليها صَريحَه يا أمِّي
بمال الدُّنيا انا افْديهُم
ولاد ضَهري ومن صُلبي
لا هَقصيهُم عشان تعبي
ولا هَسمَح بأيِّ قرار
ما يرضي ربِّنا وْ قلبي
خلِّي ضناكي فـِـ عيونِك
إرسال تعليق