أنا كنت باعزفلها
ع البحر ف عشيه
والناي فى إيدي اشتكى
وبهيه معميه
فكيت رباط جفنها
ورسمت لون حلمها
أتاريها من بختها
حدوتة منسيه
بكره بقاله كتير
متربطه حروفه
حاسس بإنه انتحر
من رعشته وخوفه
أنا نفسي ما عرفتوش
الليل نهار منكوش
مكتوب عليه فنكوش
واللي مايفهمهوش بيحي بكسوفه
الحلم خلاص طق وهيس
واللطخ بيعمل ١٠٠ ريس
وينادي على الأحلام إعدام
صدقني الحلم خلاص تيس
الحلم طموح ..
فوق سطح الروح
بينام فى البرد وتكتكته
ويقوم م النوم بلسان مدبوح
إرسال تعليق