يا طيري مين علّمك
تشكي الأنين للغير ؟
مين اللي رح يرحمك
من قسوة التفكير ؟
غيّر زوايا النظر
دانت يا طيري بصير
وانا وانت شيلة وجع
فوق السحاب أمطار
وحياتنا عمر اتخلع
م الجنّه راح للنار
من غير ولا إنذار
واقع يا طيري كسير
يا طيري مين علّمك
تشكي الأنين للغير ؟
دمّك .. وتحت الريش
متداري مش ظاهر
حاول يا طيري تعيش
داللي وقع .. شاطر
طول م المحبه إيمان
يبقى اللي باع .. كافر
لو كان مجرّد صنم
هد الصنم بإيديك
وان كان سايبلك ألم
غيره أكيد يشفيك
إرسم طريق خطاويك
حدد بداية السير
يا طيري مين علّمك
تشكي الوجع للغير ؟
م الوهم حاول تفوق
د الحلم كان كوابيس
والدم جوّه العروق
متعبّي بالمتاريس
طول م السواد ف الليل
إرسم يا طير فوانيس
وارسم نجوم ف السما
تحدف عليك الضي
وازرع سنابل فرح
تطرح لبكره الجي
ومدام ضميرك حي
حتما ف يوم ح تطير
يا طيري مين علّمك
تشكي الوجع .. للغير ؟
سيد منيرعطيه
عضو اتحاد كتاب مصر
إرسال تعليق