أجمل شئ ...
إنّك تبقى بقلب جرئ
يدخل حِصن الحُب يعافر
يفتح فيه ميت ألف طريق
يمسك علم العشق ف إيده
يركب رهوان الدقّات
يدخل ف الجنب اللي يريده
كل مكان يعمل فتوحات
يقطف م الجنه فراولتها
يفتح باب ويعدّي ممر
يعطش يدخل بين تفاصيلها
ينزل يشرب شهد النهر
بس يحاول قد ما يقدر
ما يطبّش ف النهر غريق
أجمل شئ ...
إنّك تبقى بقلب جرئ
يفرض قوانينه على العالم
يفهم جغرافيا التضاريس
مهما يقابل يفضل حالم
يكسر دراعات الكوابيس
يمشي الخطوه ف ضهر الخطوّه
عمره ما يبقى ف لحظه جبان
حتى ان قابل مطره ونوّه
يدخل بالصدر العريان
وامّا يحس بنفسه جعان
يعصر م الفاكهه اللي ف إيده
وبحلاوتها يبل الريق
أجمل شئ
سيد منيرعطيه
عضو اتحاد كتاب مصر
إرسال تعليق