أنا وانتي .. بصوت واحد
وانا وانتي .. نفس واحد
وجايز ف العيون اتنين
لكن شوفنا أكيد واحد
ف ليه يا حبيبتي نتباعد ؟
وليه يا حبيبتي دلوقتي
بشوفك .. تمسحي حكايتي ؟
وانا الشايلك ف تكويني
ورسمك بين رموش عيني
واقوم الصُبح أستفتح
بصورتك نايمه ف مرايتي
ولمّا الشمس بتخبّط
على الشباك اقول انتي
ف ليه يا حبيبتي دلوقتي
بشوفك .. تمسحي حكايتي ؟
سطور كراستك النايمه
ف حُضنك عطشانين حرفي
ولو فاكره حبيبتي زمان
أقول الشِعر ف عيونك
تقولي كمان
ولا عمرك بتستكفي
وكنتي بتيجي عز البرد
ف حُضن الغنوّه تتدفيّ
ف ليه دلوقتي تتخفّي
عن العين اللي عشقاكي ؟
وليه تخفي السطور وانتي
ف يوم خدتيها لسماكي ؟
وليه يزرع ورود قلبي
تدوسي عليها بشتاكي ؟
وليه سايبه الهوى باكي ؟
وبالدمع العيون تشتي
وليه يا حبيبتي دلوقتي
بشوفك تمسحي حكايتي ؟
دنا وانتي نهار مفتوح
على بُكره اللي جي شمسين
وانا وانتي توائم روح
مُحال نصبح ف لحظه اتنين
مُحال يفصل هوا بنّا
ولا نصبح شمال ويمين
دا لو ف الأقصى قلبك دق
رح اسمع صوته ف الحرمين
ولو كان الغرام حرفين
أكيد يبقى .. أنا وانتي
ف ليه يا حبيبتي دلوقتي
بشوفك .. تمسحي حكايتي ؟!
سيد منيرعطيه
عضو اتحاد كتاب مصر
إرسال تعليق