ياللي العمر يعدّي معاكي
لحظة حُب
ياللي بنيلك قصر زُمرّد
جوّه القلب
ياللي عيوني عليكي بتحبي
زي الطفل ف أحضان أُمه
واللا وليد ع الصدر يشب
ليه ترميني ف قلب متاهه ؟
والأحزان ع القلب تدب
ليه يا حبيبتي العُمر يعدّي
وانا دايب أشواق وحنين ؟
ليه أبني الأحلام وتهدّي
وانا زارع شوق ع الجنبين ؟
ادخلي فيّا حبيبتي ولفّي
ح تلاقي صورتك ف الشرايين
وتلاقي إسمك يجري ف دمّي
وتلاقي جوّه القلب الدرب
ياللي العمر معاكي يعدّي
لحظة حُب
هاتي إيديكي تدفّي إيديّا
وافتحي حُضن الشوق ضُمّيني
دا ف بحرك قلبي معدّيه
وغرامك بيعيد تَكويني
وحياتك يا حبيبتي يا جنّه
ما تخليش النار تِكويني
دنا ع الشطر غريق مستنّي
إيدك بالحُب تنجّيني
والأيام ترجع تحضُنّا
وتعدّينا الزمن الصعب
ياللي العمر معاكي يعدّي
لحظة حُب
أنا عطشان يا حبيبتي وشايفك
بتعبّي الشهد ف أباريق
نفسي حبيبتي ف شهد شفايفك
نفسي بجد أبل الريق
نطلع برّه حدود العالم
أخدك من عين المخاليق
نفسي تعودي زي ما كُنّا
تاخدي ف قلب القلب طريق
نفسي بجد ف قلب جرئ
يتحدى العالم ويحب
لحظة حُب
سيد منيرعطيه
عضو اتحاد كتاب مصر
إرسال تعليق