قلبك الطيّب يا طيب
لسّه رغم الحُزن طيّب
والغريبه الفرح سايبك
رغم عند الناس قُريّب
لسّه بتحوّش دموعك
لجل ما تروي الزهور
لسّه لمّا تغيب رجوعك
يبقى عند الخلق نور
لسّه فيك الطيبه بايته
مهما كان ف السكه ويل
لسّه قلبك برضُه حتّه
جيّه م الزمن الجميل
لسّه دمّك يبقى نازف
ولجراح الناس تطيّب !
ياااه يا طيّب
ياللي من أوّل حياتك
وانت فيك الطيبه عاده
ياللي تدّي ألف ضحكه
وانت محتاج للسعاده
تزرع الأفراح جناين
تشرب الأحزان زياده
تبتسم وتقول هتحلا
تلقى وحله كل مادا
ياللي واقف رغم ضعفك
شايل الهم بإراده
والزمن واخدك نيشانُه
والنيشان ما لحظه خيّب
ياااه يا طيّب
إمتى رح تعلن تمرّد
ع المواجع والحياه ؟
إمتى رح تاخد طريقك
حتى عكس الإتجاه ؟
إمتى قلبك مره ينطق
ألف لأه لكل آه ؟
إمتى رح تقطع بإيدك
كل شئ محدود مداه ؟
ترمي حُزن الروح وترمي
طيبتك الخايبه معاه
دانت عايش وسط عالم
ع الطيابه كتير .. تعيّب
سيد منيرعطيه
عضو اتحاد كتاب مصر
إرسال تعليق