إبعد براحتك
لو تلاقي البُعد راحتك
روح بجسمك ...
بس سيب روحك معايا
سيب كمان القلب عندي
أحتمي فيه من أسايا
سيب رموشك
سيب عيونك
سيب جبينك
سيب كمان لمسة يمينك
لجل أحضن بيها إيدي
سيبلي حُضنك يبقى بيتي
يعني م الأخر بقولك
روح بجسمك
بس سيب يا حبيبي كُلّك
دانت أجمل حاجه فيّا
وانت روحي ونور عينيّا
قلبي من بعدك ضحيّه
والحياه ما تكونش أبدا
إلا عندك
ليه تسوق يا حبيبي عِندك ؟
دا الغرام ضد المعانده
الغرام كيميا التوحّد
ليه تسيبني بنظره شارده ؟
وامّا اشوفك قلبي يرقص
ف تقابلني بنظره جامده
والنهارده ...
ماشي عكس الإتجاه
خطوتك ضد الهيام
يا حبيبي الحُب نعمه
وانفصال الشوق حرام
لو تحس البُعد راحتك
روح براحتك
بس سيبلي حاجه منّك
سيبلي روحك ..
سيبلي قلبك
سيب عيونك ..
سيبلي رمشك
سيب جبينك ..
سيبلي حضنك
واللا اقولك
روح طريق البُعد لكن
سيبلي كُلك
سيد منيرعطيه
عضو اتحاد كتاب مصر
إرسال تعليق