وقف الزمن
على قلبي يمكن من زمن
حط الحموله من الغيوم
ومن الهموم ومن المحن
وعصرني بين فكّين رحى
وانا قلبي رافض ينطحن
دفع التمن ...
طعم الوجع
صوت الأنين
لكنه كان رافض يلين
خايف عليكي لتخرجي
من بين ضلوعي المطحونين
م انا أصلي شايلك ف الوريد
ما اقبلش حاجه تلمسك
حتى الهوا بيتنفسك
والدم ف الشريان يدور
علشان حبيبتي يحرسك
م انتي اللي فيه
وان دمّي طرطش هتلاقيه
مطرح ما ينزل يرسمك
وعشان كده ...
قلبي اللي رافض ينطحن
واقف كما الجبل العفي
عمّال يصارع ف الزمن
عُمره ما يقبل ينقسم
ماهو مين ياروحي تكوني فيه
يقبل ف لحظه ينهزم ؟
لكن قُصادك بنهزم
وافرح كمان بالإنهزام
وتلاقي عيني بتبتسم
أصل الهزيمه ف الغرام
بتخلّي قلبي بجناحين
رافع رايات العاشقين
ويلف كل الأمكنه
والأزمنه
طاير يطوف بين جنتين
م انا قلبي بات عنده يقين
إن الهزيمه ف الغرام
يا حبيبتي دا ...
النصر المبين
سيد منيرعطيه
عضو اتحاد كتاب مصر
إرسال تعليق