على طرف جناح مفتوح ع الليل
أنا ريشه خفيفه ف حُضن الريح
بتمنى يطُل عليّا نهار
وبواسي القلب النازف دم
بكتاب أشعار
ألاقيني كما التايه وحدي
وف قلب القلب بشوف إعصار
والريح بتجيني وتخلعني
من طرف جناح مفتوح ع الليل
ترميني ف بحر مالوهش قرار
الضلمه اتنين
الليل مع ضلمة بحر الخوف
وما زال للماضي صور وحروف
بتصب ف حلقي عصير صبار
الذكرى مرار
تخطفني دقايق من نفسي
وتاخدني لأخر نقطة شوف
ألاقيكي هناك
والاقيني كما الطفل التايه
وما صدّق عاد
والمح أحضانك ليّا بلاد
أدخل واتمشّى ف بساتينك
أقطف رُمّان
واقطف ياسمين
واتمّلّى بشكل جمال التين
واختارلي مكان أبعد م العين
أرتاح جوّاه
الذكرى تروح
وارجع من تاني لطعم الأه
والاقيني خرجت من الجنّه
ورجعت النار
الذكرى مرار
وانا برضه ف ضلمة أيامي
من غيرك قلبي صبح محتار
ف تعالي حبيبتي ولو ثانيه
صُبّيلي ف حلقي عصير التوت
وتعالي حبيبتي وضُميني
من قبل ما ادوق ...
سكرات الموت
سيد منيرعطيه
عضو اتحاد كتاب مصر
إرسال تعليق