إكتبيني سطر واحد
فوق سطور الشعر جايز
يبقى إعلان للخلود
إكتبيني حتى شطره
إكسري حد الجمود
وارجعي بالذكرى حبّه
عيدي ترتيب اللي كان
قلبي كان كاتبك قصيده
أقوي من مليون ديوان
أصلي عاشقك من زمان
من تاريخ قبل التاريخ
من بداية الخلق جايز
واللا يمكن قبل منُّه
من زمن ما وصلش منُّه
للعصور الحاضره حاجة
يعني لو يحضر ح يحلف
إننا ف عصر السذاجه
وان معنى العشق أكبر
من حروف كل اللغات
وان لمّا السقا مات
كان عشان الورده تكبر
وان قصة حُب عنتر
حرف من إحساسي بيكي
واني لو مكتوبلي أرحل
يبقى سفري منّي ليكي
ياللي من ضحكة عينيكي
بانصهر واصبح رماد
زي جبل التلج إللي
جوّه حُضن الشمس بات
أو مدينه إزاز ونامت
فوق دراع جبل البارود
إكتبيني سطر واحد
فوق سطور الشعر جايز
يبقى إعلان للخلود
إكتبيني حتى شطره
إكسري حد الجمود
إنفعال الحُب ممكن
إنهزام الحُب وارد
بس م الأخر لا يمكن
يبقى قلب الحُب جامد
دا الغرام يشبه سحابه
ع النخيل تحدف مطر
يغسل الرُطب اللي طالع
شامه فوق خد القمر
وانتي جوّه القلب حاله
منها ييجي الإكتمال
يعني فعلا إستحاله
بنّا يحصل إنفصال
ياللي ف عيونك دلال
وف غرامك شئ مغاير
منُّه كان .. معنى الوجود
إكتبيني سطر واحد
فوق سطور الشعر جايز
يبقى إعلان للخلود
إكتبيني حتى شطره
إكسري حد الجمود
سيد منيرعطيه
عضو اتحاد كتاب مصر
إرسال تعليق