قصاد الحب نتعاهد _شعر_ الشاعر المصري| سيد منيرعطيه

( هو )
وليه قلبي فردته براح
مدام قلبك بيهوى الضيق ؟
وليه زارع هنا وأفراح
مدام اخترتي غيري طريق ؟
وليه أو ألف ليه تانيين
بيرموا ف الوريد سكاكين
لو الحب ف طبيعته مهين
أنا رافض يكونلي صديق
***
( هي )
بلاش تكدب على نفسك
حكايتك باينه ويّاها
دا قلبي داب عشان خاطرك
وبعت الحب بهواها
ما همّكش الوجع ليّا
ولا الدمعه اللي ف عينيّا
دا قلبي اللي انكسر فيّا
وعمري رميته ف متاهه
***
( هو )
أنا لو كنت حبّيتها
ح اسيبها ليه وح اتألّم ؟
دي صفحة ماضي وطويتها
وكانت جيّه بتسلّم
بحكم الجيره مش أكتر
وعمري ما بيها ح اتأثر
كده قلبك ح يستغفر
ويبكي غرام ويتندّم
***
( هي )
طب احلفلي مافيش غيري
ف قلبك أو على بالك
وإحلفلي أكون دايما
حقيقه وعايشه ف خيالك
***
( هو )
محال احلف على حاجه
ماهيش ملكي لكن ملكك
دا قلبي معاكي وسذاجه
أقول حلفان بدون ما املك
***
( هي )
وانا قلبي كمان ملكك
وروحي تمللي تندهلك
واخاصم قلبي لمّا ازعل
عشان بيسيبني ويروحلك
***
( هو وهي معا )
مدام جوّانا شئ واحد
بلاش على حبنا نعاند
د انا وانت / ي روحين عايشين
ما فيش أرواح بتتباعد
تعالي / ى ف معبد الأشواق
قصاد الحب نتعاهد
قصاد الحب ..
نتعاهد
سيد منيرعطيه
عضو اتحاد كتاب

٤٣